Narain sos anticos chi b’haiat una femina de Tanaunella ( in bida mea l’hapo connotta) chi andait a chircare sos pizzinneddos minores chi non tenian sas dentes e chi fin chena battijare.

E fit periculosa abberu…

Difatti sa zente chi la temian ponian sas tripides, in sos tempos : una appicada in sa janna e una in su fuchile, a bentre in susu, po no’ falare issa.

Ponian finzas sa falche in sa janna… ca issa contaìat sas dentellas e non finiat mai e gai non haiat tempus – contande contande – pro facher male a su pizzinnu.

(Cussas chi si fachen survule , naschin chin sa coa).

E andait dae dommo in dommo inube b’haiat pizzinnos chena battijare , chin s’iscusa de pedire sale.

Custa femina ’e Tanaunella est bennida finzas a dommo. Socra mea bi credet in custas cosas e m’hat nau, sa die :

-Daebillu su sale a Bustiana! , gai si muttiat custa femina.

E issa si lu leait , si l’imbolicabat e si lu poniat in mesu ’e sa falda. Si leait su sale, sa farina…

Poi una ’olta , jeo m’accattao in dommo ’e una comare mea chi teniat unu pizzinneddu minore, Zoseppeddu. Fit fedale de fizu meu, de Foreddu , chi deo tenia a coddu ( minoreddu fiat, de unu paju ’e meses). E mi che fia andande chin socra mea dae custa dommo. Zoseppeddu fit drommidu .

Comare mea l’haiat corcadu in su lettu e l’hat nadu a sa mama:

-O ma’, bi, so’ lassande a Zoseppeddu drommidu e deo so’ andende a lavare a sa funtana.

Sa mama l’hat nau:

- Bae, bae…ja m’inzorro dae inoche a un’iscutta…

Nois no che semus andaos e issa - comare mea - est bennida chin nois unu trettu ca depiat lavare a sa funtana.

A sa pac’ora ( sa funtana fit accurzu a dommo ), m’han bocchiada:

- O coma’! su pizzinnu ammentades cando bi che sezis andadas bois, inube fit?!

- Eh! Non bi falet su raju! Su pizzinnu fit in mesu ’e su lettu!

- E commo non b’est! Mama m’hat bocchiada commo chi non b’est!

Attacata a currere…

Mi leo fizu meu e chin socra mea torramus andare a inie.

Chircamus su pizzinnu , e su pizzinnu non bi fit in locu.

E fimus chirchende iffora , in sas carreras, in sos contones…e niunu l’haiat bidu, niunu l’haiat toccadu.

Poi, socra mea (fit unu tipu meda abbistu , chi narian chi fit indemoniada da comente fit abbista…) hat nau:

-In sutta ’e su lettu , abbadiadu hazes?

- Emmo! - hat nau sa minnanna ’e Zoseppeddu –Emmo chi hamus abbadiau!

Intantu issa non s’est fidada.

B’haiat una cassetta in sutta ’e su lettu prena ’e ferramenta (finzas filu ’e ferru b’haiat!). Chi tirat cussa cassetta e in dae secus bi fit su pizzinnu imbolicadu in su tulle chi teniat pro sa musca. Fit isvinidu…

- Curride ch’est inoche su pizzinnu! Mì…a Zoseppeddu! Mì a Zoseppeddu!

Arribamus tottus e Zoseppeddu fit inintro: nieddu comente su carbore in tottu sa carena. Teniat s’alinu mancari.. .

Lu leat sa mama, si lu ponet in su pettu, li dait sa titta… e l’est torradu s’alenu…e l’est torradu su colore, mischineddu…

E narain chi fi sa survule chi lu fit leende.

Sa survule si che suzzat su sambene dae su poddighe ’e su pede.

Po no’ lu leare , a sos pizzinnos sas mamas li ponian unu braccialeddu chin sas perlinas , gai sa survule contabat sas perlinas e non finiat mai…

Commo survule non bi n’hat , ca cando naschin chin sa coa bi chi la truncan…

 

(Contu , fattu a sa mastra Rosalba e a sos pizzinos de iscola, dae minnanna Larenta , naschida a Limpiddu su doichi de agustu de su ’ 21)