Unu grazie caru, o mastru Satta,

pro cussu bellu omaggiu! Mi nde onoro

de lu tenner in dommo, e che tesoro

lu cherzo cunservare cale mata

de rosas, chin sos petalos de oro

e-i sas fozas luchidas de prata,

cand’est de su lentore galu intata

e sos nuscos ch’arriban a su coro.

Est una tanca tottu fioria,

est una binza pronta a binninnare,

est una tela ricamada a bantu.

Cando inganidu so de poesia

sas bramas de su coro pro calmare

mi pasco cussos versos de incantu.