Deus onnipotente
Deus, Deus, Deus meu,
t’amo, t’amo, t’amo tantu.
In sos chelos d’amarantu
bolan lacrimas d’anneu.
Tue solu, tue ebbia
ses s’amore, sa bontade ;
ses s’amicu, babbu e frade ;
ses su sole, s’armonia.
In sos arbores in frore,
in sas erbas de beranu
bio a tibe, soberanu
de su chelu, imperadore.
In su bolu ’e sos puzones,
in su cantu ’e sas sirenas
bi ses tue, in sas amenas
durches limpidas cantones.
Cando můrinu su chelu
tinghet s’anima ’e sa terra,
sos benenos de sa gherra
ferin finzas su banzelu.
Deus meu, cale idea,
cale brama m’hat ispintu
a ti facher custu pintu
in s’arcana limba mea?
Cale anticu piscadore
chin sas retes tintas d’oro
chirco sempre su tesoro
a costazu ’e su Sennore.
Babbu eternu, babbu bonu,
babbu ’e Cristos immortale,
ses su bene universale,
de su mundu su padronu.
Ses su mere , su Sennore
ch’intro ’e coro amo continu;
ses s’Ispiritu Divinu
babbu e fizu Redentore.