Chie ischit custa orassione
e non l’imparat
depet essere dae Deus perdonau.
Chie l’ischit
e non la narat
sa die ’e su giudissiu universale
chentu amen e Gèsu
li hana dare…
Tzia Rosaria Loche nos hat nau chi bi fin orassiones da narrere cando s’andabat in Cresia.
Sa prima si nabat toccande su muru de sa Cresia :
Commo tocco su muru
su muru ’e Cresìa
testimonzos bi sian.
A s’ora ’e su bisonzu
bi siat testimonzu.
Commo tocco sa porta
s’anima mea assolta
de babbu e de mama
de tottu sa zenìa
assolta s’anima mia.
Tzia Adelina, in gadduresu :
Entro in ’iesa
e toccu polta
l’anima mia siat assolta
’a di mama
’a di babbu
e di tottu la zenìa
l’anima mia assolta sia!
Aba santa beneitta
in su Missale iscritta
iscritta in su Missale
Deus mi salvet da ogni male.
Aba santa beneitta
sos anzelos l’han iscritta
chin sos doichi Apostolos
sian perdonaos sos peccatos nostros.
Sa minnanna ’e Austinu nos hat nau :
M’inzinucro in custa poltina
de s’anima meichina
de su corpus presente
beneittos e laudados
tottu sos sacramentos.
Zia Lillia nos hat nau su saludu a sos Santos:
Bonas dies Santos tuttus.
Prima a su Sennore nostru
di poi a sa Gloriosa
bella che una rosa
bella che unu lizu.
Jeo m’adoro cuddu caru fizu.
Jeo m’adoro cuddu fizu caru
s’anima mea appèdas in manu .
Sa minnanna ’e Marilena s’ammentat custa:
Bonas dies Santos tuttu
a primma a primma
a su Sennore nostru
e dae Bois a sa Gloriosa:
bella sezis comente una rosa
bella sezis comente unu lizu
a Bois amo e a su vostru fizu.
S’anima mea tenzèdas in manu.
Chi siat zusta e divina.
Mi salvazes dae sa meichina.
Tzia Rosaria Loche, nos hat nau custa , chi si nabat prima de sa Comunione:
Anzelu meu
chin amoridade
picca su corpu meu in castidade,
picca s’anima mea chin amore
e bene ’ennidu siat su Sennore
e bene siat apparizzadu.
Si carchi peccadu m’hapo irmenticadu
a Bois lu confesso, Redentore meu.
Morzat su peccadu e bibat semper Deus.
Ostia consacrada
bona e comunicada
comunicada e bona
de sa Missa padrona
padrona de sa Missa
jeo m’adoro a issa
jeo m’adoro a Deus
siat perdonau su peccadu meu.
Sa minnanna ’e Marilena :
Ostia bene sacrada
bene comunicada
comunicada e bona
de sa Missa padrona.
Issa padrona ’e Missa
deo m’adoro a issa.
deo m’adoro a Deus.
Deus mi perdonet su peccadu meu.
Caliche dignu ,
caliche d’oro,
chin tecus mi signo,
chin tecus m’adoro.
Custa nos l’hat nada sa minnanna ’e Austinu:
Mira, Deus, chi mi cando
e no’ isco si che torro.
Si, pro casu, mi nche morjo
s’anima ti raccumando.
Tzia Lillia s’ammentat custa:
Segnore a dommo mi cando
e no’ isco si che torro.
Se mai mi nche morjo
s’anima ti raccumando.
Sas dies colan …e su cartellone murale creschet e, chin issu, creschimus finzas nois. Hamus imparau tottu sas orassiones e semus registrande tottu.
Meda zente benit in s’iscola a bier su nostru traballu. Piachet a tottus. Finzas a oje sun bennios a nos azzudare tzia Rosaria, tzia Adelina, tzia Lillia, sa minnanna ’e Marilena, su babbo ’e Manuela, sa minnanna ’e Austinu, sa mama ’e Fabriziu…
In sos tempos colaos , a die finia, fit rivoltu a Deus s’urtimu saludu .
Finzas oje (est su battoro ’e martu) nos han nau chimbe orassiones.
S’orassione si nabat prima di chi si dormire.
Custa l’hat nada tzia Lillia:
"Jeo mi colco in su lettu meu
tres cosas li domando a Deus:
confessione
comunione
ozu santu
babbu, fizu, spiritu santu".
Cust’attera nos l’hat nada sa minnanna ’e Marilena :
Jeo mi colco in custa sepoltura
de mi che pesare non so’ sicura.
Non so’ sicura de mi che pesare
otto anzelos a m’abbrazzare:
battoro in pes e battoro in cabita.
Nostra Signora acculzu amie istat.
Issa mi narat:
-Drommi e reposa
non timas niente cosa.
Amen.
Tzia Adelina hat nau custa:
Mi colco in lettu meu
anima e colpo doco a Deus;
anima e colpo a Sante Iuvanni
lu nemico non m’inganni
nell’ora della vita
e nell’ora de la molte.
Amen.
Sa minnanna ’e Lucianu hat nau cust’attera :
Mi colco in custu lettu
chin d’unu anzelu perfettu,
chin d’unu anzelu cantende
Gesù Cristu preichende
a sa luna e a su sole.
Gesù, nostru Salvatore.
Deus, Santu Serafinu,
nostra Signora de bonu caminu
nostra Signora de bonu ’erattu
mi colco in custu lettu.
Amen.
Su minnannu ’e Franco hat nau custa :
Su lettu meu est de battoro contones,
batteros anzelos mi si ponen :
duos in pes e duos in cabita.
Nostra Signora accurzu a mie istat
Nandemi:
-Drommi e reposa,
non timas de mala cosa.
Santu Serafinu, s’anzelu biancu
Babbu , Filiu e Ispiritu santu".
Su manzanu, cando s’ischidaban, naban de goi .
No l’hat nau tzia Teresa Mazzone :
Ruche in janna
ruche in sant’Anna
ruche in su fughile
sas animas malas
chi pottan bissire.
Custa orassione si nabat su bintichimbe ’e Nadale
A benis coro
e ajoni a tuddire su recreu
a ponner mira chin Deus
chin Deus de sa ruche.
Sas piagas chi juchet
paren ispinas crudeles.
Sos Judeos unidos
l’han dau a bier fele.
Lu lean pro sos santos pilos
e lu juchen trasinone.
« A fizu meu hazes bidu ? »
"De’ esse’ cussu ch’appo bidu
In mesu a sos dottores.
Pro essere minore
Creo ch’appa balanzau".
"Padre, m’hazes cossolau
gai bos cossolet Deus!
Sas novas de fizu meu
sun novas de cuntentu."
Sa die ’e su naschimentu
de su paltu ’e Maria
bi fit Zoseppe a cumpanzia
Nastasia a l’azzudare.
Nascidu est su Messia
su bintichimbe ’e Nadale.
Gesù Santu Salvatore
in s’oltu s’imbrinuchei
e dae nie si tucchei
fin a dommo ’e Pilato.
Sa mama, mischina, iffattu.
"A fizu meu hazes bidu passare
chi sa santa ruche a pala
e sa lattuja cadena?
Custu si chi dolet pena
custu si chi dolentìa
custu fizu chi tenìa
tantu ’onu e tantu amadu
dae su chelu est faladu
faladu sena margura
faladu sena dolore
Gesù Santu Salvatore."
xxxxxxxxxxxxxxxxxxxx
Cando si tuccat Santa Maddalena
tottu Sos Santos si ponen in bia
"A umbe andadese
signoredda mia?"
"A mi chilcare fizzicheddu meu.
Mi l’hat leau unu cane giudeo
e mi lu attidu dae monte a monte.
Sa ruche d’oro tenede in fronte
sa ’e s’argentu non la podet poltare.
Deus nos salvede de pena e de male.
S’ave Maria, Sa grassia prena,
Deus nos salvet de male e de pena.
S’ocru malu
In sos tempos colaos , sa zente crediat in s’ocru malu ( e calichunu bi credet finzas oje). Si nabat custa orassione pro doichi bortas..
Nos l’hat nada sa minnanna ’e Marilena:
Cristu Cristu
cando a su mindu ’inisti
bellu e bonu mi paristi.
Unu chiriu poltai
unu chiriu poltende
un’anima benifichende
unu libru lezzende
un’anima santifichende
una candela inchedende
una in su Paradisu.
Laudadu siat su Babbu e su Fizu.
Sempere siat beneittu e laudau
su numen sou mentovau.
Sas animas malas
Pro binchere sas animas malas si nabat , pro tres bortas, custa orassione.
No l’hat nada tzia Teresa:
Jeo chi passo in trainos
in locu ’e aba fine
in loci de aba utile
jeo mi cuffesso e mi cundono.
Mi ponzo su juale in sa conca.
Pro sanare sa pessone malaida
Anzelos de Maria
fachideche colare a fizu meu
sa mala maladia.
Cando calichunu juchiat dolore ’e matta, si nabat custa orassione.
Custa no l’hat nada tzia Teresa Mazzone:
Sant’Andrìa, Sant’Andria
sa matta mi dolia.
Sa matta chin sa ’entre.
Su pride prontamente
a ponnere sa manu in bia.
Terrinu iffustu e paza rasada
su dolore ’e sa matta siat passada.
Cust’attera l’hat nada sa minnanna ’e Franco:
Sant’Andrìa, Sant’Andrìa
sa matta mi dulìa
sa matta chin sa ’entre
accudide prontamente.
Paza iffusta, paza rasada
si no pro ’more mea
pro ’more sua
su dolore ’e sa matta si che fua!
Custa orassione si nabat
pro si c’andare su zacculite.
Tres mendulitas
tres ciculitas e tres fae
baetiche a s’ammorada, bae !
Cust’attera l’hat nada sa minnanna ’e Bobore :
Singuzzu, singuzzu
catteddu codi muzzu
catteddu calzitatu
andatinni aunde l’unnamuratu!
Traballu fattu in iscola dae sa mastra Rosalba e dae sos pizzinnos de sas elementares